مش أنا
من زمان ايدي سابت
وفي شبابي روحي شابت
كل عين ع الكون جفنها أرخ سدوله
اليوم بطُوله
ليل وحالك
فجأة خلصت المعارك
وايد سابتني
وايد رمت لي لي طوق نجاة
وسجدة صلاة
وانتهى أمري بسلام
الحياة بتمر فيلم
بس صامت بدون كلام
لسه عايش
لسه شايف كل حاجة انما
اشتراكي في الحياة
بقى ضيف شرف
له مشاهد قبل اسدال الستار
والمُشاهد حتى لو قال كلام
بالنسبة لي ساكت
وفي انتظار
حد يجي يقول .. ستار
ولوقتها
كل شيء بيمر جنبي
بحسبه ذكري وفاتت
بقلم مريم النقادي
رباعيات مريومة
